آراء الكنيسة الأرثوذكسية بالبروتستانتية
عن: Alitheia Initiative
ظن بعض أخوتنا البروتستانت بسبب توجهنا في نقد البنية اللاهوتية للبروتستانتية إننا بنقدّم خطاب كراهية .. أو دعوة للتكفير .. أو وصمهم بإنهم غير مسيحيين .. وفي الحقيقة ده غير حقيقي
أخوتنا البروتستانت مسيحيين وليسوا خارج المسيح .. احنا مشكلتنا مع البروتستانتية كنسق لاهوتي وكرؤية لله والإنسان والعالم .. ومش مشكلتنا أبدًا مع أحبائنا البروتستانت اللي احنا واثقين إن غالبيتهم أناس أتقياء وفي قلبهم محبة لربنا زي ما قال أبونا مينا المتوحد (البابا كيرلس السادس) ..
لكن زي ما قلنا قبل كدة إن طبيعة العلاقة الشخصية بين الإنسان والله اللي بتفرضها البنية اللاهوتية للبروتستانتية لا تتجاوز حدود الكلام والحس والمشاعر .. لأن مفيش مفهوم للسر الكنسي في البروتستانتية .. مفيش ممارسة كنسية واتحاد كياني بالمسيح في البروتستانتية .. الكنيسة في البروتستانتية مجموعة من الأعضاء المتناثرين فكرًا ووعيًا وتوجهًا واللي بيجمعهم مجرد الانتماء للمسيحية .. مش جسد المسيح الكوني الجامع الحي والفاعل .. مفيش في البروتستانتية دور فاعل للإنسان لا في عملية الخلاص ولا في حياة الإنسان نفسها بل كل شيء بيتم إحالته ناحية الله في غياب تام للإنسان وحريته وإرادته…
لأجل هذه الأسباب وأكتر منها .. احنا عندنا مشكلة مع البروتستانتية .. لكن البروتستانت هما إخوتنا وليسوا خارج المسيح .. احنا بننظر ليهم نظرة الموعوظين .. اللي لسة مختبروش الشركة والاتحاد مع المسيح عريس نفوسنا .. أو زي ما قال أبونا مينا المتوحد .. اتنين مخطوبين مغرقين بعض كلام حب بس لسة محصلش بينهم شركة واتحاد
طيب هل عندنا مشكلة مع البروتستانت في حد ذاتهم؟
الحقيقة احنا معندناش مشكلة إن حد يقدّم تعليم بروتستانتي أو يمارس أفعال بروتستانتية داخل الجماعة البروتستانتية اللي بينتمي ليها .. لأن كل واحد حر واحنا مش أوصياء على حد .. احنا بس عندنا مشكلة كبيرة مع تقديم تعليم بروتستانتي داخل كنائسنا الأرثوذكسية .. لأن ده تشويه للحقيقة المسيحية وعدم أمانة تجاه الحق الكنسي .. وإفساد للحياة الكنسية ولحقائق لاهوتية أساسية عن الله والإنسان وطبيعة العلاقة بينهم…
ولأن البروتستانتية متوغلة -منذ القرن التاسع عشر وحتى الآن- في كنائسنا .. فاحنا من واجبنا إننا نقدّم نقد للبنية اللاهوتية البروتستانتية المسيطرة على عقول الأقباط واللي مانعاهم إنهم يفهموا الحياة الكنسية .. ويصلوا القداس بفهم .. ويشبعوا من الإنجيل وكتابات الآباء .. ويعيشوا الحياة المسيحية بشكل حقيقي وسوي .. لأن الأرثوذكسية هي رؤية وتوجُّه تجاه العالم والوجود .. وهي نمط حياة بنسلك بيه .. أساسه هو ما فعله المسيح لأجلنا في التدبير الإلهي .. اللي أودعه في الكنيسة .. وبالتالي صلتنا بالمسيح هي خبرة حقيقية .. خبرة ملكوت الله الحية الآن في الكنيسة في الإفخارستيا…
تابعوا آخر أخبار موقعنا على
