كيميا السرطان (3) يعني إيه مادة مسرطنة ؟ – أيمن غالى

مفهوم المواد المُسرطنة Carcinogenics ؟
حا نلاقي علي الإنترنت مقالات وموضوعات كتيرة مرعبة في عناوينها كلمة المسرطنات .. ..
والمُسرطنات/المواد المُسرطنة: هي المواد إللي ممكن تسبب سرطانات Cancers، ودي لها جداول معروفة للمتخصصين ..
المقالات المختلفة؛ علي مواقع التواصل الاجتماعي كلها كلام فارغ، وما تحاولوش تقروها؛ لأنها مكتوبة من ناس غير متخصصة وبهدف الفرقعة وجذب المتابعين ..
فعلاً؛ عندنا جداول بالمسرطنات؛ لكن مش معني إني أتناول مادة مEسرطنة؛ إني حا أصاب بالسرطان ..

للإصابة بالسرطان بمادة مسرطنة معينة ضروري توافر عدة شروط:
1- تناول المادة المُسرطنة بتركيزات محددة ..
حا نلاقي مثلا؛ تركيز المادة الحافظة (نيتريت الصوديوم Sodium Nitrite)؛ للأغذية المحفوظة محدد حسب توصيات عالمية، وحا نلاقي مكتوب علي كتير من الأغذية المحفوظة وأغلبها من الحلويات (ألوان صناعية مصرح بها).
نيتريت الصوديوم والألوان الصناعية دي من المُسرطنات؛ لكن في إستعمالها بتركيزاتها المسموح بيها؛ ما فيهاش أي مشكلة.
2- المداومة علي تناولها لمدد محددة وطويلة
ضروري للإصابة بسرطانات معينة؛ تناول مادة مُسرطنة بتركيزات عالية كما في البند السابق بصورة منتظمة لمدة طويلة ممكن توصل لـ 30 سنة (الإصابة بسرطان المثانة بسبب تناول دقيق الدرة يومياً بدلاً من دقيق القمح أو دقيق القمح المخلوط بدقيق الدرة).
3- إستعداد الشخص للإصابة
ضروري الشخص يكون عنده الإستعداد للإصابة (مرتبط بالخريطة الجينية للشخص)؛ يعني التدخين من مسببات أنواع معينة من السرطانات ومنها سرطان الرئة؛ لكن مش معني كده إن كل مدخن سيصاب بسرطان الرئة، وضروري جسم المدخن يكون عنده إستعداد للإصابة (ودي بقي سهل معرفتها بتحاليل معملية غير متاحة للإستعمال الروتيني؛ يعني مش حا نلاقيها في معامل التحاليل العادية وبتتم في معامل خاصة ومعامل أبحاث ومكلفة جداً جداً)
4- التاريخ المرضي في العائلة
لو في العائلة تاريخ مرضي لنوع معين من السرطانات؛ زي سرطانات المثانة والرئة؛ يبقي الشخص عرضه للإصابة بيه (لو دخن لمدة طويلة).
ولو العائلة عندها تاريخ مرضي لسرطان الكبد؛ يبقي الشخص ضروري يبتعد عن الأغذية المحفوظة بقدر الإمكان والإعتماد علي الأغذية الطازجة.
مشكلة المواد المُسرطنة إنه في مداومة تناولها؛ بيحصل لها تراكمات داخل الجسم Accumulation وتسبب السرطانات ..

طيب إزاي أعرف ممكن آكل إيه من المأكولات المحفوظة وإيه لأ ؟
فيه منظمة عالمية للدواء والأغذية (منظمة الأغذية والدواء الأمريكية FDA)؛ بتصدر توصياتها وبتنقل عنها منظمة الصحة العالمية والعالم كله، وبتبقي التوصيات في تجنب تناول أطعمة معينة إلا بشروط؛ يعني مثلا ممكن آكل أكلات محفوظة بكميات أد إيه في الشهر أو الأسبوع وهكذا (وللأسف العامة ما يعرفوش الكلام ده ولا الأطباء بيهتموا بمعرفته ولا أخصائيي التغذية، وبيقولوها علي المطلق بلاش أطعمة محفوظة وأطعمة بألوان صناعية) .. ونتمنى متخصصى التغذية نقل توصيات منظمة الاغذية والدواء الأمريكية FDA للعامة بصورة مُبسطة بخصوص المسرطنات بمختلف انواعها ..

الخلاصة:
ما تخافوش من تناول أي أطعمة تحتوي علي مواد معروفة إنها مواد مُسرطنة, وقدموا لأولادكم حلويات بألوان صناعية عادي؛ لكن بصورة قليلة جداً ويكون فيه فترة زمنية كافية بين المرات المتتالية

الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم

الآراء الواردة في هذا المقال هي آراء الكاتب فقط، ولا تعكس آراء الموقع. الموقع غير مسؤول على المعلومات الواردة في هذا المقال.