الأدوية إللي بِتفسَد خلال أيام من بداية إستعمالها (8) – أيمن

بعض الأدوية؛ زي المضادات الحيوية Anti Biotics؛ بتبقي فى صورة بودرة Powder form, ومع حلها في مايَّة (كمذيب Solvent)؛ بنبدأ نعد عدد أيام محددة لصلاحيتها, وبعدها بنتخلَّص منها وبنرميها (تَخَلُّص آمن) ..
وأدوية تانية بتبقي في صورة سايلة، وبمجرد فتحها للإستعمال؛ بنعد عدد أيام محددة – مذكورة في بيان الدوا – وبنرميها بعد كده ..
الأدوية دي بتبوظ ليه ؟ وهل ممكن نزوِّد تاريخ صلاحيتها ؟
المركبات الكيميائية والدوائية الجافة؛ عمرها بيمتد لسنين طويلة وممكن تعيش للأبد (لو محفوظة كويس)؛ لكن مع حَلَّها (إذابتها) في مذيب (مايَّة)؛ بيبدأ العد التنازلي لصلاحيتها .. ليه بقي ؟
لإنها بتتكسر وبيحصل لها تكسير Degradation مع الوقت, ومنها إللي ممكن يتكسر خلال دقايق أو ساعات قليلة زي البنسلين Penicillin .. ومنها إللي ممكن يستمر لأيام ..
إيه إللي بيحصل ؟
وجود المايَّة مع دخول الهوا للعبوة؛ بيعمل عملية من إتنين؛ يا أكسدة Oxidation (من خلال التفاعل مع أكسجين الهوا والإتحاد بيه؛ يعني المركب بيكتسب أكسجين Oxygen؛ أو بيفقد هيدروجين Hydrogen)؛ أو يحصل له إختزال Reduction عكس الأكسدة (من خلال فقد أكسجين أو إكتساب هيدروجين)، وفيه حالات تانية للأكسدة والإختزال ..
وعملية الأكسدة والإختزال بتحتاج إلي وسط مائي (متوفر بعد حَل البودرة بالمايَّة) ووجود أكسجين أو هيدروجين (متوفر من الهوا)، وظروف مناسبة من الطاقة (درجة الحرارة وضوء الشمس) ..
وكل ما درجة الحرارة بتقل (من خلال حفظها في التلاجة)؛ كل ما سرعة تفاعل الأكسدة والإختزال والتكسير بيقل، ونفس الكلام بإبعاد الأدوية عن ضوء الشمس المباشر .. مع فتح العبوات واخد الجرعة بسرعة واعادة غلقها بسرعة, وعدم ترك العبوات الدوائية مفتوحة ..
وبكده ممكن عُمر الأدوية دي تزيد كام يوم زيادة.

خلاصة الحلقات السابقة:
– لكل مُركب دوائى ظروف خاصة تضمن فعاليته وبقاؤه فى صورة صالحة وآمنة للإستخدام
– مدة الصلاحية المطبوعة على العبوات الدوائية غير حقيقية وهى لأغراض قانونية وتجارية ويمكن إستعمالها بعد مدة الصلاحية المطبوع بعد سؤال متخصص فى الكيمياء أو الفارماكولوجى
– مدة صلاحية الأدوية تختلف من دواء لآخر حسب تركيبه الكيميائى
– قبل السؤال عن إمتداد صلاحية الأدوية؛ ضرورى التأكد من مؤهل الشخص الموجه إليه السؤال؛ لأن بعض القائمين ببيع الأدوية بالصيدليات غير مؤهلين للرد

أتمنى للجميع السلامة ووافر الصحة

الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم
#ما_ترميش_أدوية_منتهية_الصلاحية

الآراء الواردة في هذا المقال هي آراء الكاتب فقط، ولا تعكس آراء الموقع. الموقع غير مسؤول على المعلومات الواردة في هذا المقال.