كيميا السرطان (1) – يعني إيه سرطان ؟ – أيمن غالى

تنويه مهم:
الموضوع باللغة المصرية الحديثة وتباعاً سنقوم بالترجمة للعربية
وإحنا بنقرا موضوعات كيميا السرطان Cancer Chemistry؛ لوحذفنا المصطلحات العلمية (إنجليزي/لاتيني) الكلام والمفهوم مش حا ينقصه حاجة بالمصري ..
أنا بأكتب المصطلحات العلمية للي يحب يقرا عنها ويراجع مفردات الموضوع بصورة أوسع من خلال المراجع العلمية ..
وممكن تحذفوا المصطلحات دي أو تتجاوزوها وإنتم بتقروها وما تتعبوش نفسكم في ترجمتها أو محاولة فهمها؛ هي زيادة علي النص المكتوب بالمصري ومالهاش تأثير عليه ..

يعنى إيه كيميا السرطان Cancer Chemistry ؟
كيميا السرطان؛ أحد فروع علم الكيمياء الحيوية Bio Chemistry, وبيدرس المتغيرات الكيميائية في كيميا الجسم (من إنزيمات Enzymes وهرمونات Hormones ونواتج نشاط الأورام Metapolites وغيرها) والتفاعلات إللي بتتم داخل الجسم مسببة للمرض أو لعلاجه، ودراسة عوامل الكشف عن الإصابة وتحسن علاجها، إلي جانب مسببات السرطان لعوامل كيميائية ..

يعني إيه سرطان Cancer ؟
زي أي مبني بيتكون من وحدات صغيرة (قوالب طوب)؛ أجسامنا بتتكون من وحدات صغيرة إسمها خلايا Cells (كرات لازقة في بعضها)، والخليَّة Cell لها تركيب محدد بتتكون من جزء خارجي له جدار وداخله وسط هلامي بمواصفات إسمه سيتوبلازم Cytoplasm، وداخل السيتوبلازم فيه أعضاء الخلية Cell Organelles وعلشان هي صغيرة جداً بنقول عليها عِضِّيات Organelles، وداخل السيتوبلازم فيه جزء داخلي إسمه نواة nucleus، وداخل النواة فيه نواة أصغر منها (نُويّة Nucleolus)، وداخل النوية فيه شريطين متوازيين مترابطين ببعضهم بروابط عرضية (شبه السلم النقالي؛ عمودين وبينها وصلات عرضية)، والشريطين ملفوفين حوالين نفسهم (مبرومين؛ زي حبلين مبرومين مع بعض) ..
الشريطين دول إسمهم الحامض النووي DNA (deoxyribonucleic acid) (نسبة لنواة الخلية)، والحامض النووي ده عبارة عن سجل كامل للصفات البشرية للشخص نفسه ومستحيل تلاقي شفرتين لشخصين متطابقين (ممكن التشابه بين الإخوة، والأب وأولاده، والأم وأولادها؛ لكن يستحيل التطابق) ..
والحامض النووي ده هو المسئول عن تكاثر الخلايا؛ للنمو أو لتعويض الخلايا إللي بتموت (يعني الخلية بتنسخ نفسها)؛ يعني خلية الجلد تتكاثر وتدينا خلايا جلد جديدة، وخلايا الكبد تتكاثر وتدينا خلايا كبد جديدة وهكذا ..
الحامض النووي ده بيتعرض دايما للكسر؛ لأسباب منها وجود ذرات أكسجين حُرَّة Oxygen free radicals، ودي بتبقي من نواتج عمليات حيوية بتتم داخل أجسامنا؛ زي مخلفات تفاعلات، والجسم بيحاول يتخلص من جذور الأكسجين الحرة بإستمرار بعدة طرق؛ لشدة خطورتها علي الحامض النووي ..
الشريط المزدوج للحامض النووي في تعرضه لذرات الأكسجين الحُرَّة؛ بيتم كسره بالعرض (يعني ما بيتشقش بالطول)، وممكن نقول بيتقطّم؛ زي ما بنكسر عود قصب ..
في أجسامنا إنزيم إسمه (دي إن إيز DNAase) مهمته إنه يِلحِم الكسور وإعادة شريط الحامض النووي لأصله ..
لكن أحيانا اللحام بيتم غلط؛ زي مثلا لو عندنا فستان مكون من قطعتين (بلوزة وچيب)، وعلشان يبقي فستان مظبوط؛ ضروري خياطتهم في بعض علي عدلتهم؛ يعنى واجهة البلوزة تبقى مع واجهة الچيب، وإحتمال الخطأ في إن الخيَّاط؛ يخيَّط وش البلوزة مع ضهر الچيب، وهو ده إللي بيحصل مع حالات اللحام الخطأ لشريط الحامض النووي، وبنسمى الموضوع ده بالطفرة Mutation ..
وفي حالة اللحام الخطأ (الطفرة)؛ بيحصل عندنا حاجة من إتنين:
1- الخلية تموت (وده الغالب)
2- الخلية تستمر حَيَّة بحامض نووي مِلّخْبّط ومغلوط الشفرة (ودي بتبقي إسمها خلية سرطانية cancer cell)؛ بتتكاثر بسرعة مكونة تجمع كبير من الخلايا السرطانية؛ بنقول عليها ورم سرطاني Malignant Tummor ودائما ما تهاجم الخلايا المجاورة لها ..

الجزء التانى من الموضوع حا نشوف فيه مسببات أخري لتكوين الخلايا السرطانية غير ذرات الأكسجين الحُرَّة ..

الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم

الآراء الواردة في هذا المقال هي آراء الكاتب فقط، ولا تعكس آراء الموقع. الموقع غير مسؤول على المعلومات الواردة في هذا المقال.