كيميا السرطان (6) أمراض بسيطة تتحول إلي سرطانات – أيمن غالى

الإلتهابات، وإستخدام كريمات تفتيح البشرة؛ من أهم مسببات بعض أنواع السرطانات

الإلتهابات وسرطان عنق الرحم والبروستاتا
بعض الإصابات بالسرطانات بتبدأ لأسباب مرضية سهل علاجها، ومنها الإلتهابات Inflammations ..
أي إلتهاب بيبدأ في أي مكان في الجسم أو لأي عضو بنقول عليه إلتهاب حاد، Acute Inflammations وده سهل علاجه جداً في أيام قليلة ..
البعض بيرفض العلاج وبيقول إن الألم ممكن تحمله وبالتالي ما فيش داعي يروح لطبيب أو إنه ياخد أدوية ..
ومع إستمرار الإلتهابات الحادة؛ بتتحول إلي إلتهابات مزمنة Chronic Inflammations، والإلتهاب المزمن صعب علاجه وبيحتاج لوقت طويل للعلاج وممكن يحتاج لشهور ..
وحتي البعض بيتعايش مع المرض وتحمل آلامه، ومع إستمرار الالتهاب الحاد؛ بيتحول إلي أورام سرطانية Malignant Tumors ..
وده بنشوفه بكثرة في حالتين منتشرين جداً في مجتمعنا في مرضين معروفين جدا، وهم إلتهابات عنق الرحم Cervicitis والبروستاتا Prostatitis ..
وبالتالي سرطانات البروستاتا وعنق الرحم لا علاقة لها بالأمراض السرطانية إللي ممكن تتوارث في العائلة الواحدة لإنها أمراض نتيجة لإهمال علاج أمراض ناتجة عن ظروف حياتية للشخص نفسه ..

كريمات تفتيح البشرة وسرطان الجلد
مشكلة منطقتنا في لون بشرتنا إللي لا هو أسود (ما فيش أمل في تفتيحه)، ولا هو أبيض (مش محتاج للتفتيح)؛ لكن قمحي (فيه أمل للتفتيح) ..
وكريمات التفتيح Blaching Creams؛ منها ما يحتوي علي مركبات زئبق (ممنوعة وممكن تتواجد في كريمات تحت السلم والمجهولة المصدر)، ودي بتعتمد علي تغيير تركيب بروتين خلايا الجلد، وبالتالي في عمل طفرة Mutation في خلايا جلد البشرة (إتكلما عن الطفرات في الحلقة الأولي كأهم عوامل تكوين السرطانات)، وإللي نتيجتها موت الخلايا أو تحولها إلي خلايا سرطانية ..
نوع تاني من كريمات التفتيح؛ بيبقي مكتوب في تركيبته مادة هيدروكينون Hydroquinone، ودي من مسببات إلتهاب خلايا الجلد (وإحنا فهمنا مشكلة الإلتهابات ممكن تسبب إيه علي المدي البعيد) ..
ومشكلة إستعمال كريمات تفتيح البشرة؛ في ضرورة إستعمالها يوميا وبدون توقف؛ لإنه مع التوقف يزول تأثير كريم التفتيح ..
النوع التالت المتاح مؤخراً في الأسواق وظهر عالمياً في نهاية تسعينيات القرن العشرين؛ هي كريمات تحتوي علي مادة كوچيك أسيد (حمض الكوچيك Kojic Acid)، وده أأمن كريم لتفتيح البشرة؛ لإنه مادة طبيعية ناتجة عن تخمير الأرز، وبتشتغل علي مادة الميلانين Melanin (صبغ الجلد)، وبتمنع تكوينه، ودي بتعطي نتيجة – للبشرة العادية – بعد أسبوعين، وللبشرة الدهنية من بعد شهرين وأكتر ..
وكتير من الناس إللي عاوزة تأثير في وقت سريع؛ حا تستعمل كريمات الهيدروكينون، وإللي عاوز أسرع وأسرع حا يستعمل كريمات مركبات الزئبق، والإتنين أخطر من بعض ..

الخلاصة:
تجنب الإلتهابات المزمنة لأي عضو من أعضاء الجسم وضرورة المواظبة علي العلاج حتي ولو طالت لفترات طويلة كإلتهابات البروستاتا وإللي بيستمر علاجها لأكتر من سنة ..

الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم

الآراء الواردة في هذا المقال هي آراء الكاتب فقط، ولا تعكس آراء الموقع. الموقع غير مسؤول على المعلومات الواردة في هذا المقال.