عزيزي الهرطوقي ، بخصوص عمادة الأولاد الصغار  

بتقلي ما بنعمد الولد  قبل ما يصير بسن الرشد ، طيب عندي كم سؤال لو سمحت :

– ليش أول ما بيخلق إبنك بتركض بتسجلو على اسمك ليحمل إسمك و هويتك و ورثتك ، ليش ما بتتركو بس يكبر يقرر إذا بدو يكون إبنك أو لا ؟ شو الأهم إسمك أم إسم المسيح ؟ هويتك أو هويتو ؟ ورثتك أو الحياة الأبدية ؟

– ليش أول ما بيخلق و هو وطفل و وَلَد إنت و أمو بتطعموه أكل  و بتشربوه مَي و بتختاروا عنو أنواع الأكل ، ليش ما بتنطروه يكبر و يقرر ؟ بتقلي بموت الجوع لوقتها . و أنا بقلك إنّو بموت الجوع روحياً و يمكن يموت قبل ال ١٨ بدون نعمة المعمودية يلي هي  سبب الخلاص الرئيسي .

 – ليش  بتقرر عنو الطبيب و المدرسة و اللغات و أنواع الرياضة و أنواع الأصدقاء ؟ ليش ما بتتركو يكبر و يقرر ؟

– ليش إذا بدك إبنك يصير أهم عارف بيانو أو أهم رياضي أو رسام بتخليه يبلش بعمر ٣ أو ٤ سنين و ما بتنطروا ليكبر و يقرر ؟ و إذا قرر على كبر  شو رح يطلع منو بهالمواضيع ؟

– ليش نسيت يا عزيزي كلام المسيح إذا بتعتبر حالك مسيحي : ” دعوا الأطفال يأتون إلي ؟”

– بتقلي الرسل ما عمدوا أولاد بقلك كتير غلطان و جاهل بالكتاب المقدس و حياة الكنيسة الأولى و بالمنطق أو ال common sense ، يعني كيف الأهل بياخدوا جنسية أمركانية و بيمنعونها عن إبنهم حتى يكبر و هو يقرر ؟ أي أهم ، أمريكا أو الملكوت ؟

– بعد بدك ؟. بفتكر بكفي .

عزيزي الهرطوقي أو عزيز المسيح يلي الهراطقة عم يلعبولك بعقلك ، لا تخرب بيت ولادك و لا تتحمل مسؤولية خسارتهم الأبدية .

عزيزي الهرطوقي ، ليش حارق حالك و مهتم تبشر الناس  عن المسيح و حارم ولادك منو حتى ما يلبسوه بالمعمودية و نسيت قول الكتاب : “أنتم الذين بالمسيح اعتمدتم المسيح قد لبستم ” ؟

شفت ليش بنعمّد الولد و حتى من أول يوم ؟ و كمان لأن الأهل راشدين و العرابين راشدين و برافقوه بنموه الروحي يوم ورا يوم و سنة ورا سنة يعني على إيمانهم .

كل مين ببعّد المعمودية عن الأطفال هو إبن لإبليس و خادمه .

عزيزي الهرطوقي … صدقني بشفق عليك .