إزاى نزوِّد تاريخ صلاحية الأدوية (الكريمات والمراهم) (4) –

بعض المركبات الدوائية بيتم تحضيرها فى صورة كريمات Creams أو مراهم Ointments لإستخدامها لتحسين حالة الجلد وللأمراض الجلدية, ولأمور أخرى ..
والأدوية إللي علي شكل كريمات Creams أو مراهم Ointments؛ بتتكون من قاعدة Base ومواد فعَّالة Active ingredients, والمواد الفعّالة ممكن تِكُون مركبات أيونية Ionic Compounds أو تساهمية Covalent Compouns تخضع للظروف إللى إتكلمنا عنها فى الحلقات السابقة (الفرق بين الكريمات والمراهم؛ إن الكريمات بِتبقى نسبة المَايّة فيها أقل من نسبتها فى المراهم ونسبة الزيوت فى المراهم أكبر من نسبتها فى الكريمات (ولكل منها إستعماله الخاص فى حالات مرضية مختلفة)؛ يعنى الكريمات بتبقى صلاحيتها أطول نسبياً من المراهم؛ لإن الزيوت من السهل تأثرها بالظروف المحيطة والعوامل المختلفة من ضوء وحرارة والتفاعل مع أكسجين الهوا وتكسيرها وتحللها) ..
القاعدة دي بتتكون من شمع Wax (شمع عسل نحل Bees Wax, والردئ منها من شمع البرافين Paraffine Wax) ومايّة Water وجلسرين Glycerol وكح-و*ل Alcohol وزيوت Oils.
إللي ممكن يتلف ويكون له تاريخ صلاحية قريبة فى قاعدة الكريمات هي الزيوت والشمع؛ لإنها مواد عضوية Organic Materials (مركبات تساهمية شرحناها فى الحلقات السابقة)، ودي علشان نحفظها لأطول فترة ممكنة؛ ضروري نحفظها في درجات حرارة قليلة؛ أقل من 8 درجات مئوية (في أرفف باب التلاجة من تحت) ..
وحاجة تانية مهمة ضروري نعرفها ان الزيوت والشموع بتتلف بسبب الأكسجين (من الهوا) والضوء؛ علشان كده علب الكريم بتبقي مُغلّفة من جُوَّه بورق فويل Aluminum foil؛ نحتفظ بالفويل بدون نزعه ونكشف أقل جزء منه لإستعمال الكريم ونعيده إلى وضعه بعد الإستخدام.
ومع كريمات أنابيب الكريم Cream tubes؛ الكريمات المحفوظة فى العبوات البلاستيكية Plastic tubes عمرها بيبقي اقل من الكريمات المحفوظة فى العبوات المعدنية Aluminum tubes؛ لانه في حالة الضغط علي الانبوبة البلاستيك -المرنة- لإخراج الكريم؛ الانبوبة بترجع لحالتها وبتشفط هوا وأكسجين الهوا بيتفاعل مع شمع وزيوت الكريمات وبيعمل لها أكسدة Oxidation وبيتلفها مع الوقت (وبيزيد معدل الاكسدة والتلف Denaturation فى وجود الضوء وزيادة درجات حرارة الوسط) ..
يعني الكريمات اللي في عبوات معدن بتحتفظ بالكريمات لمدة صلاحية أكتر من العبوات البلاستيكية المرنة (زي عبوات معاجين الأسنان؛ وان كان معجون الأسنان مش حا يتأثر بدخول الهوا للمكونات؛ لانه خالي من الزيوت والشموع)؛ يعني العبوات البلاستيكية تصلح لمعاجين الاسنان ولا تصلح لكريمات الجلد والبشرة؛ بالرغم من كونها مُعتمة وغير مُنفذة للضوء؛ إلا إذا تم إستخدامها بطريقة سيتم شرحها فى السطور التالية.

وعلشان نزوِّد مدة صلاحية الكريمات المحفوظة فى أنابيب بلاستيكية مرنة؛ ضرورى نعمل الآتى:
– نحتفظ بالعلبة الكرتونية الخارجية لأنبوبة الكريم.
– نفتح غطاء الأنبوبة فى أول إستعمال لها, ونضغط برفق لإخراج الكمية المطلوبة مع عدم رفع الأصابع الضاغطة على الأنبوبة, ثم غلق الأنبوبة دون السماح لها بالرجوع إلى طبيعتها علشان ما تسمحش للهوا بالدخول بحجم الكريم إللى تم إخراجه من الأنبوبة’ وهكذا فى كل عملية إستخدام للكريم.
– مع حفظ الأنبوبة داخل علبتها الكرتون فى رف سفلى فى باب التلاجة مع عدم تعريضها لضوء الشمس المباشر ودرجات الحرارة العالية.
يتبع ..

الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم
#ما_ترميش_أدوية_منتهية_الصلاحية

الآراء الواردة في هذا المقال هي آراء الكاتب فقط، ولا تعكس آراء الموقع. الموقع غير مسؤول على المعلومات الواردة في هذا المقال.